Date: 14.03.2023
Autorin: Sarah
Position: Port of Sankt George
Nautical nautical Position: N32°16.8 W064°426
Etmal: 8.408
Ship: Regina Maris

Liebe Eltern, um allen Kulturen und Sprachen an Bord gerecht zu werden, wird der heutige Tagesbericht auf Schweizerdeutsch geschrieben. Für Verständnisprobleme entschuldige ich mich im Voraus.
Eure Quotenschweizerin🇨🇭

Happy Day, Happy Hour

Hüt hemmer de ganz Morge döffe z Schiff putze (mal wieder). Me hen mal wieder es anders Schuelschiff gsichtet, diesmal vo High Seas high school. Für de Fall, dass die üs wenn go bsueche cho, hemmer ganz toll klar Schiff gmacht, also alles putzt. Alles. Ich selber bin im Messroom tätig gse. Ganz Vorbildlich hemmer döt alli Polster gsuuget, jedi Oberflächi mehrmals abgwüscht, d Lampe poliert, d Fenster putzt, d Kaffimaschine deepcleaned, de Bode kehrt und gwüscht. Au dusse an Deck sind mini Kamerade aktiv gse: Es isch entrostet worde, entsalze, gschrubbt und abgspüelt. Na dezue sind alli ufghängte Seil jetzt gleich lang. Üsseri Kabine hen au sicher schu schlechteri Täg gse, au wenn nach Ussag vo Officer Jake mini Kabine ganz sloppy sii sött… ich gse das andersch.

Endlich wieder in Usgang

Nach der grosse Putzaktion hemmer mal wieder an Land döffe, sogar mit Handys. Die meiste vo üs sind direkt zur nögste WLAN Stell. Glücklicherwiis isch das grad vor em Schiff vo High Seas high School gse und me hen es wundervolles Schwätzli mit de Schüeler vo döt gfüert. Sie sind echt unglaublich nett und me freuen üs, dass mer sie wieder gseh döffen (hoffentli). Will es paar vo üs ihri Handys in Kuba ned ka hen (inklusive mir) ischs hüt nach langer Ziit wieder zu einem Telefon mit Dehei cho. Ich glaube sogar, dass d Kommunikationspause jetzt länger gsi isch als damals über de Atlantik. Ach und hüt hemmer ganz spezielle Usgang: Me döffen sogar bis am nüüni dusse bliibe. Sust hemmer spötistens wenns dunkel worde isch müsse zruck si.

Nachschub!

Woni hüt wieder zruck zum Schiff cho bi, hani an Deck öppis wunderschönes gse: WC Papier! Nach üssere chliine Krise wo üs z WC Papier knapp worde isch, simmer jetzt wieder bestens usgrüstet. Au Öpfel hemmer mal wieder frischi becho. Juhu, me freuen üs alli!

Pura Vida

Grüße:
Mia: Herzlichen Glückwunsch zum Geburtstag Paul🎊, nachträglich….Ich hoffe, Du hast schön gefeiert!

Lina: Vielen lieben Dank für die ganzen Geburtstagswünsche! Ich hab‘ euch lieb und werde die nächsten Tage safe mal anrufen. Für alle zukünftigen OCs: Bei OC Geburtstag zu haben ist einmalig und unvergleichlich!!

Brian: Liebi Grüessli an mini Familie, ha eu gern!